موڕشید برادۆستی – سۆران:
غەیدا بێڕۆخی مامۆستای زانکۆ و شارەزای بواری ئابووری، هۆکارەکانی بەرز بوونەوەی نرخی دۆلار بۆ زاری کرمانجی ئاشکرا دەکات و دەڵێت:”یەکەمینجارە نرخی دینار بەم شێوەیە بەرامبەر دۆلار داببەزێت، بە دڵنیاییەوە ئەگەر حکومەتی عێراق هەندێ رێکاری بەپەلە نەگرێتەبەر، دینار داڕمانی زیاتر بەخۆیەوە دەبینێت و کاریگەری لەسەر هەموو لایەکیش دروست دەکات.
غەیدا بێڕۆخی مامۆستای زانكۆ و شارەزای ئابووری، دەڵێت:” بانكی ناوەندی عێراق بە هەماهەنگی حكومەت، بۆ كۆنتڕۆڵ كردنی قەیرانی دارایی و كورت هێنانی بوددجە بەشێوەی كاتی، لە مانگی كانوونی یەكەمی ساڵی 2020، بانكی ناوەندی عێراق نرخی دۆلارێكی ئەمەریكی لە 1200 دینار بەرزكردەوە بۆ 1450 دیناری عێراقی، ئەمەش بەمەبەستی پاراستنی دارایی عێراق و رێگری كردن لە داڕمانی بوو، لە یاسایی دارایی و ئابووری رێگەپێدراوە و كارێكی گونجاوە، بەڵام لەو نرخەی دیاری كراوە زیاتر و كەمتر، كڕین و فرۆشتنی پێوەبكرێت كارێكی نائاساییە و پێویستی بە هەڵوەستەكردن و بەدوواداچوونە.
ئەو شارەزایەی ئابووری، بۆ زاری کرمانجی ئاشکرای کرد:” لە دووای ساڵی 2003 وە، هیچ كات دینار بەم شێوەیە نرخی دانەبەزیووە، یەک دۆلار بەرامبەر 1660 دینار بێت، ئەم بەرزیوونەوەی دۆلار كاریگەری نەرێنی لەسەر حكومەتی عێراق دروست دەكات و كارێكی نایاساییشە، هاووڵاتییان و تەنانەت بازرگانانی نیگەران كردووە و شلەژانی كۆمەڵگەشی لێكەوتۆتەوە، ئەمەش دووای پابەند نەبوونی حكومەتی عێراق و بانكی ناوەندی بوو بە رێنماییەكانی ئەمریكا، چونكە بەپێی رێنوێنی ئەمریكا نابێت بەهیچ شێوەیەك دۆلار بچێتە وڵاتی ئێران و لەگەڵ ئەو وڵاتە بارزگانی پێوەبكرێت.
غەیدا بێڕۆخی، گووتیشی:” بۆ گەڕاندنەوەی بەهای دینار بۆ نرخی ئاسایی خۆی و رێگری كردن لە داڕمانی زیاتر، پێویستە حكومەتی ئێستای عێراق و بانكی ناوەندی لەگەڵ ئەمریکا گفتوگۆ بکەن و پابەندبن بە سەرجەم رێنماییەكانی ئەمریكا و رۆژانەش بڕێكی زیاتر دۆلار بخرێتە بازاڕ، هەروەها ئیجرائاتی پێویستیش لەگەڵ سەرجەم ئەو بازرگان و لایەنانە بكەن كە هەوڵی سپی كردنەوەی دۆلار و رەوانە كردنی دۆلار دەدەن بۆ ئێران”.
