لە شۆڕش، ئافرەتان رۆڵی كاریگەریان هەبوو

زاری كرمانجی -مێرگەسۆر:

لیوا یاسین مام یوسف ئاغا كۆركەیی، پێشمەرگەی دێرین و جێگری فەرماندەی فەرماندەیی هەڵگورد، لە دیدار و بەرنامەی پێشمەرگەی زاری كرمانجی تیشكی خستە سەر خەبات و ژیانی پێشمەرگایەتی و دەشڵێت، پێویستە هەموو لایەنەكان لەگەڵ سەرۆك بارزانی هاوكار بن، بۆ ئەوەی ژیان و گوزەرانی پێشمەرگە باشتر بكرێت و كوردستانیشمان زیاتر پارێزراوبێت.
لە بەردەوامی قسەكانیدا یاسین مام یوسف ئاغا كوركەیی، راگەیاند: ” لە ساڵی 1979 بوومەتە پێشمەرگە لە لیژنەی ئاوارە لە زێوە، كە بەرپرسی ئەو كاتی لیژنە تەیب ئاكرەیی بوو، كە ئێستا لە ژیان نەماوە، هەتا ئێستاش بەردەوام بوومە و لە زۆرێك لە شەڕ و داستانەكان بەشداریم كردووە، كاتێك بۆ یەكەمجار بوومە پێشمەرگە و چەكی شەڕەفایەتیم كردە شان، سەرۆك بارزانی سەرپەرشتی بەرەكانی شەڕی دەكرد”.
گووتیشی: كاتێك لە ساڵی 1975 خەڵكی باشووری كوردستان لەبەر زوڵم و زۆرداری رژێمی بەعس ئاوارەی ئێران بوون، لەوێ‌ سەرۆك بارزانی و ئیدریس بارزانی توانیان خەڵك كۆ بكەنەوە و پشتگیریان لێ دەكردن و خۆیان سەرپەرشتی دەكرد و رەوانەی هەرێمی كوردستانیان دەكردن، بۆ ئەوەی بەرگری لە خاكی پیرۆزی كوردستان بكەن، هەروەك ئیدریس بارزانی داوای لە خەڵك كرد هەر كەسێك بێتەوە كوردستان یارمەتی دەدەین و ئۆتۆمبێلی بۆ دەگرین، ئەو كاتە خەڵكێكی زۆر هاتنەوە و شۆڕش زیاتر بەهێز كەوتەوە، ئیدریس بارزانی زۆر لەگەڵ پێشمەرگە تێكەڵ بوو، بەردەوام لەگەڵ پێشمەرگە بوو دەرگای لەسەر كەس دانەدەخستن، لەگەڵ پێشمەرگە نانی دەخوارد خۆی لە پێشمەرگە جیا نەدەكردەوە، خەڵكی ئێمە لە ئێران زۆر پشتگیریان لە پێشمەرگە دەكرد”.
ئەوەشی خستەڕوو: لە شۆڕش و كوردایەتی ئافرەتان ڕۆڵی كاریگەریان هەبوو، چونكە پیاوەكان لەبەرەی پێشەوەی شەڕ بوون، ئافرەتەكان لە ماڵەوە سەرپەرشتی ماڵ و منداڵ و خێزانەكانیان دەكرد نان و ئاویان بۆ پێشمەرگە دەهێنا و پشتگیری زۆری پێشمەرگە بوون، ئافرەت كرێكاری دەكرد بەس بۆ ئەوەی منداڵەكانی برسی نەبن و نان بۆ پێشمەرگە ببات”.
وەك ئەو فەرماندەیەی پێشمەرگە ئاماژەشی بۆی كرد: ” چەكی ئەو كات زۆر پێشكەوتوو و وەكو ئێستا نەبوو لە 120 ملیم زیاتر نەبوو، بێكیسی بوو دۆشكە بوو، لەگەڵ چەند چەكێكی دیكە، ئەگەر چەكی ئێستا ئەو كات هەبوایە دەمان توانی زۆر شت بكەین، بەڵام بەهۆی ئەو بیروباوەڕەی هێزی پێشمەرگە هەیبوو، بەو چەكەی بەدەستیەوە بوو هەر ئەوەش وای كرد كە بەسەر دوژمن سەر بكەوین”.
لیوا یاسین مام یوسف ئاغا كۆركەیی، ئەوەشی خستەڕوو: داستانی خواكوڕك، شەڕی مێرگەسۆر، لە زۆر داستانی دیكە بەشدار بوومە، سەرۆك بارزانی لە پێشەوەی شەڕ بووە لە خواكوڕك وتارێكی گرنگی دا، ورەی پێشمەرگەی بەرز كردەوە، باسی لە گۆڕینی بارودۆخەكە كرد و ماوەیەكی زۆر پێنەچوو گۆڕانكاریەكی زۆر بەسەر عێراقدا هات و بارودۆخ و رەوشی پێشمەرگە باشتر بوو، سەرۆك بارزانی هەموو كات خۆ بە پێشمەرگە دەزانێت و لە تەمەنی 16 ساڵی بووە پێشمەرگە ئەوەش ورەی پێشمەرگەی زیاتر بەرز كردەوە، هەر داستانێك تێدا بەشدار بووایە، لەبەرەی پێشەوە بووە پێشمەرگە توانیویەتی سەركەوتنێكی یەكجار گەورە بە دەست بهێنێت”.
ئەوەشی خستەڕوو: لە كاتی شەڕ و داستانەكاندا سەرەڕای ئەوەی شەهیدمان دەداو پێشمەرگە بریندار دەبوون، كەچی كاتێك دیلی سوپای عێراق دەوكەوتنە دەست پێشمەرگە، سەرۆك بارزانی دەی فەرمووی دەبێت، مامەڵەیەكی باش لەگەڵ دیلەكان بكەن”.
ئەو فەرماندەیەی پێشمەرگە، دەشڵێت: ” مانگی 6ی ساڵی 2014 لەسەر فەرمانی سەرۆك بارزانی چووینە رەبیعە، سوپای عێراق شوێنەكانی خۆی بەجێهێشتبوو، لە شەڕی داعش دوو جار بریندار بووم، بەداخەوە شاخەوان چەتۆ حالی، شەهید بوو، كە یەكەم شەهیدی شەڕی داعش بوو، كە خەڵكی سنووری قەزای سیدەكان بوو، شەڕی داعش زۆر جیاوازی هەبوو لەگەڵ شەڕەكانی دیكە، جیاوازەكەی ئەوە بوو شەڕی داعش لە دەشت بوو، بۆمب و مینیان دەدانەوە، خۆیان دەتەقاندەوە، بەڵام شەڕەكانی دیكە لە شاخ بوو بۆ پێشمەرگە ئاسانتر بوو”.
داواكاریش بوو: لە هەموو حیزب و لایەنەكانی كوردستان، كە هەموویان وەكو هێزی پێشمەرگە یەكگرتوو بن و لەگەڵ سەرۆك بارزانی هاوكار بن، بۆ ئەوەی كوردستان رۆژ بەرۆژ خۆشتر ببێت و ژیان و گوزەرانی پێشمەرگە باشتر بكرێت و كوردستانیشمان زیاتر پارێزراوبێت، هەروەك سەرۆك بارزانی كار بۆ یەكگرتنەوەی هێزی پێشمەرگە دەكات.
لەدوا قسەكانیدا لیوا یاسین مام یوسف ئاغا كۆركەیی، ئاماژەی بەوەدا: ” زیاتر لە 44 ساڵە پێشمەرگەمە زۆر یادەوەری خۆش و نەخۆشمان بینیوە، ئێستاش دەبینین هەرێمی كوردستان ئازادە و هەموومان لە ئاوارەی گەڕاینەوە و ئازادانە لەسەر ماڵ و حاڵی خۆمانین، دەبێت ئەو ئەمن و ئەمانە بپارێزین بۆ ئەوەی بە مافەكانی خۆمان بگەین، ئەوەی ناخۆشیش ئەوەیە لە زۆر داستان و شەڕ بەشداریمان كردووە، چەندین كەسمان لەگەڵ بووە شەهید بوونەن یان لە ژیان نەماون“.