پشتیوان كەریم- سۆران:
لە دیدارێكی ڕادیۆیی زاری كرمانجیدا، هابیل زرار برادۆستی، بەڕێوەبەری بەڕێوەبەرایەتی لاوانی ئیدارەی سۆران باس لە ڕەوشی لاوان دەكات لە سنوورەكە و هێما بۆ كردنەوەی بەڕێوەبەرایەتی لاوان دەكات، هاوكات ئاماژە بە كۆیی ناوەندەكان دەكات لە سنووری ئیدارەی سەربەخۆی سۆران، چەند پرسێكی دیكەی پەیوەست دەخاتە ڕوو.
لە دەستپێكی قسەكانیدا بەڕێوەبەری لاوانی ئیدارەی سۆران، بۆ زاری كرمانجی گوتی:”بەڕێوەبەرایەتی لاوانی سۆران پێویستییەكی زۆر گرنگ بوو لەڕووی ناوەندەكان كە پێشتر سەر بە دیوانی بەڕێوەبەرایەتی لاوانی پارێزگای هەولێر بوون و مەركەزیەتی بڕیاردان پێشتر لە هەولێر بوو، بەڵام دوای كردنەوەی ئەم بەڕێوەبەرایەتییە دەسەڵاتەكان لەمەودوا لە سنووری ئیدارە بۆ گشت ناوەندەكان دەدرێت، هاوكات ناوەندە وەرزشییەكان شوێنێكی گرنگن بۆ لاوان و وەرزش دۆستان، شوێنێكە بۆ پێگەیاندنی لاوان لە ڕووی (وەرزشی، ڕۆشنبیری، كۆمەڵایەتی، زانستی، پیشەیی)،”
ئەوەش دەڵێ:”بە بوونی بەڕێوەبەرایەتی لاوانی ئیدارەی سۆران، ڕۆتینات كەم دەبێتەوە و دەتوانین زیاتر چاودێر بین بەسەر ناوەندەكان و كار و پرۆژە و چالاكییەكانیان، هەروەها لە داهاتوودا ئامانجمان زیاتر خزمەتكردنی گەنجان و لاوانی ئیدارەی سۆرانە و لە هەموو ڕوویەكەوە هاوكار و پاڵپشت و نزیكیان دەبین و خزمەتیان دەكەین،”
هابیل زرار بەڕێوەبەری لاوانی ئیدارەی سۆران ئەوەش دەخاتە ڕوو:” لە سنووری ئیدارەی سەربەخۆی سۆران هەر قەزا و ناحیەیەك ناوەندێكی وەرزش و لاوانی لێ بێت كە پێی دەگوترێت مەركەز شەباب، خۆی لە خۆیدا ئەمە قوتابخانەیەكە لە بوارە جیاجیاكان، لە ئێستادا بەڕێوەبەرایەتی لاوانی سۆران چوار ناوەند لە خۆ دەگرێت هەریەك كە ئەویش ناوەندەكانی مێرگەسۆر، سیدەكان، ڕواندز، سۆرانە و هەروەها كردنەوەی ناوەندی چۆمان و خەلیفان یش لە بەرنامەدایە و ڕەزامەندیمان وەرگرتووە و لە داهاتوویەكی نزیكدا دەكرێتەوە.
بەڕێوەبەری لاوانی ئیدارەی سۆران ئاشكراشی دەكات:” كۆی ناوەندەكان ئەنجوومەنی كارگێڕی تایبەت بە خۆیان هەیە و پێویستیان بە وانە بێژ هەیە، پلانمان هەیە كۆمەڵێك چالاكی گشتی لە تەواوی ناوەندەكان ئەنجام بدەین بە مەبەستی ڕەخساندنی هەلی كار بۆ لاوان و زۆربەی خولەكانیش گرنگن و لاوان فێری كاری پیشەیی دەبن،
بەڕێوەبەری لاوانی ئیدارەی سۆران باس لەوەش دەكات كە زۆربەی باڵەخانەكانی سۆران وەزارەتەكانی دیكە لەوێن كە موڵكی لاوانە، ئەوەش دەڵێ بینایەمان ئامادەیە لە ڕووی میلاكاتیش گرفتمان هەیە و زۆربەی ناوەندەكان و بەڕێوەبەرایەتیمان پێویستیان بە فەرمانبەر هەیە.
لە كۆتایدا هابیل زرار بەڕێوەبەری لاوانی ئیدارەی سۆران گووتیشی:” دەمانەوێت بەڵێن بدەین كاری جددی بكەین بۆ لاوان و دوای كۆتایی هاتنی وەرزی خوێندنی ئەمساڵ و داخستنی دەرگای خوێندنگەكان، كۆیی ناوەندەكان ببێتە شوێنی دووەمی گەنجان و لاوان لە سنوورەكەمان بۆ ئەوەی كاتەكانی خۆیان تێدا بەسەر ببەن بە كردنەوەی خولی جۆراوجۆر بۆیان.”
