محەممەد مەحموود – سۆران :
٢٦-١ هەموو ساڵێک بە رۆژی جیهانی گومرگ دیاریکراوە، لە سنووری ئیدارەی سەربەخۆی سۆرانیش جگە لە هەبوونی دەروازەیەکی نێودەوڵەتی کار بۆ کردنەوەی دوو دەروازەی تریش دەکرێت و کارکردن بۆ کردنەوەی دووەمین دەروازەبەفەرمی دەستی پێکردووە “.
دوێنیش سەرپەرشتیاری ئیدارەی سەربەخۆی سۆران پڕۆژەی درووستکردنی رێگای خاڵی سنووری زێتی بەسەرکردەوە، بڕیاروایە خاڵە سنوورییەکە لە ماوەیەکی نزیکدا بە رووی گەشتیاران بکرێتەوە”.
لە سنووری قەزای سیدەکانیش کار بۆ کردنەوەی دەروازەیەکی تر دەکرێت ئەویش دەروازەی کێلەشینە، بەمەش ئیدارەی سەربەخۆی سۆران دەبێتە خاوەنی سێ دەروازەی بازرگانی لە داهاتوودا” .
لای خۆیەوە ئیحسان چەلەبی، قایمقامی قەزای سیدەکان بە زاری کرمانجی راگەیاند” تا ئێستا بە فەرمی کاری بازرگانی لە مەرزی کێلەشین نەکراوە، هەوڵدەدرێت لەدوای چاککردنی رێگەی دوڵی زەرزێ، کارئاسانی زیاتر بکرێت بۆ ئەو بابەتە، لێکتێگەیشتن لە نێوان حکومەتی هەرێم و کۆماری ئیسلامی ئێران هەیە بۆ مەرزی کێلە شین “.
لە پەیامێکیشدا بەبۆنەی رۆژی جیهانی راگەیاندنی دەروازەی نێودەوڵەتی حاجی ئۆمەران پەیامێکی بڵاو کردەوەو دەڵێت ” بە بۆنەی رۆژی جیھانی گومرگ کە رۆژی ( ١/٢٦ ) هەموو ساڵێکە ، گەرمترین پیرۆزبایی لە بەرێوەبەر و جێگر و بەرپرس و کارمەندانی بەرێوەبەرایەتی گومرگی حاجی ئۆمەران و بەرپرس و کارمەندانی پۆلیسی گومرگی حاجی ئۆمەران و کارمەندانی ھەموو گومرگەکانی کوردستان دەکەین و داوای سەرکەوتن بۆیان دەخوازین.
راگەیاندنی دەروازەی نێودەوڵەتی حاجی ئۆمەران باس لەوەشدەکات ” لەم قۆناخە سەختە دا گومرگەکان بە ھەموو توانا و شەونخونیان و بە جێ گەیاندنی ئەرکەکانیان توانیویانە رۆڵێکی سەرەکی ببین لە بەردەوامی دان بە پڕۆسەی ئاڵوگۆڕی بازرگانی نێودەوڵەتی و گەشەی ئابووری وڵاتدا و سووک کردنی باری قوڕسی ھاووڵاتییان و دابین کردن و ھەبوونی پێداویستیەکان لە بازاری ناوخۆ، و کۆکردن و زیادکردنی داھاتی حکومەتی هەرێمی کوردستان بۆ کەمکردنەوەی گوشارەکانی قەیرانی دارایی”.
