وەزارەتی رۆشنبیری نەك پاڵپشتم نەبووە، بەڵكو دەستخۆشیشیان لێنەكردووم

شەهلا رەشید – سۆران:

جابر سەعید، ئەو گۆرانیبێژەی هەر لە تەمەنی منداڵییەوە خولیای گۆرانی گۆتن بووە، لە پڕۆگرامی بەهرە لە رادیۆی زاری كرمانجی باسی كارە هونەرییەكانی خۆی دەكات، كە ئێستا خاوەنی هەشت كلیپ و سێ بەرهەمە. دەشڵێ: بۆ گەیشتن بە خۆشەویستەكەم قوربانی زۆرم داوە.
هونەرمەند جابر سەعید، گوتی: ئەگەر بەشێوەیەكی قۆڵ باس لە ژیانی خۆم بكەم بەشی دوو فیلم دەكات، چونكە لە تەمەنی منداڵی زۆر هەژاری و نەداریم بینیوە و بێ باوكیش گەورە بوومە، بۆیە ژیانی من پڕ بووە لە نەهامەتی، هەروەها من لە ئاوارەی ژیاوم ئەمەش حەسرەتێكی گەورەیە، تەمەنم 5 ساڵ بوو برا گەورەكەم كە سەرپەرشتی ماڵەوەی دەكرد، گۆرانییەكانی بۆ من دەنووسین و دەیخوێندنەوە زۆر هاوكاری دەكردم منیش ئەم گۆرانییانەم لەبەر دەكردن، ئەوەبوو لە تەمەنی شەش ساڵی شارەزایم پەیدا كرد لە گۆرانی گوتن و هەستم لا دروست بوو و لە راپەڕینی ساڵی 1991 لە سۆران بەشداری كۆنسێرتێكم كرد كە سەرۆك بارزانی و شڤان پەروەر لەم ئاهەنگەدا ئامادەبوون، دواتر زیاتر هەوڵمدا بۆ كارەكەم بۆ ئەوەی بتوانم زۆرترین خزمەت بە هونەری كوردی بكەم، ئەوە بوو لە ساڵانی 1993 بۆ 1994 دەستم بە تۆماركردنی كاسێت كرد، هەروەها بۆ تۆماركردنی یەك كاسێت لە تەمەنی نۆ ساڵیدا بە هەفتە شار بە شار بە گیرفانی بەتاڵ لە خێزانەكەم دوور دەكەوتمەوە، هەروەها لە تەمەنی چواردە ساڵی سیدیەكم لە ئێران تۆمار كرد، لەو بارودۆخەی كە من تێدا بووم چەند كەسێك ئاوڕیان لێدامەوە و هاوكاریان كردم سوپاسیان دەكەم.
گۆرانیبێژ جابر سەعید، بێ دەنگی دەشكێنێت و دەڵێت: دایكم پێویستی بە چاودێری پزیشك هەبوو، بۆیە بە ئەركی خۆم زانی كە ماوەیەك لە هونەر و ئاهەنگەكان دووربكەومەوە و هەموو كاتەكەم بۆ خزمەتكردنی دایكم تەرخان بكەم كە ئەمەش ئەركێكی پیرۆز بوو بۆ من، لە هونەردا دەرفەتی دووبارە هەیە، بەڵام دایك دووبارەبوونەوەی نییە، بە داخەوە دایكم كۆچی دوای كرد ئیتر هەر بێدەنگ بووم، بەڵام لە ئێستادا دەمەوێت خزمەتی هونەری كوردی و هەوادارانم بكەم، هەر چەند ترسی ئەوەم هەبووە كە لەبیر بكرێم هەر چەندە هەموو كاتێك من لە بیركراوم لە دەستپێكی هونەرەكەم كە گەڕامەوە كوردستان تا ئەم چركەیە لە ئاست هونەری كوردی نەك بۆ مەرامی خودی خۆم لەبیر كراوم، نەك تەنها من بەڵكو زۆر كەسانی وەك من مافیان خۆردرا تەنانەت بە یەك دەستخۆشی كردنیش، مەبەستم خۆ نییە، بەڵكو گەنجەكانی دیكە كە بەهرەیان هەیە ئەگەر من ببمە قوربانیش ئاساییە، چەندین جار سەردانی وەزارەتی رۆشنبیریمان كرد و باسی گلەییەكانی خۆمم كرد، بەڵام بێ سوود بوو هیچیان نەكرد، ئەگەر هەر كارێكیشم كردبێت لە ئاست هونەرەكەم ئەوا بە گیرفانی خۆم كردووە تەنانەت دەست خۆشیش نەكراوم، هەموو ئەمانەش بۆ هەوادارانم بووە، لە شەڕی داعش كاتێ هێرش كرایە سەر كوردستان و هەموو پێشمەرگەكان لە پێشەوەی جەنگ بوون لەوێ پەیوەندییان پێوە دەكردم بۆچی بێدەنگی و گۆرانی بۆ پێشمەرگەكان ناڵێی، ئیمكانیاتم نەبوو و نەمدەتوانی، لە لایەنی هونەری هیچم بۆ نەكراوە كە دەبێتە 30 ساڵ لەو بوارە كار دەكەم بە هەموو هەوڵەكانی خۆم ئەوەی كە لە دەستهەڵاتی خۆم بووە بۆ هونەرەكەم كردووە، هونەرمەندی توركیا ئیبراهیم تاتڵیس، كە هەموومان دەزانن هونەرمەندێكی گەورەیە كاتێك كە مێلودی منی گۆتەوە لە هەموو گۆڤار و رۆژنامەكانی كوردستان بڵاوكرایەوە و ئەرشیڤكرا ئایا ئەمە جێگەی شانازی نەبوو بۆ من، ئایا ئەمە جێگەی دەستخۆشی نەبوو، بۆچی وەزارەتی رۆشنبیری لەمبارەوە كە هونەرمەندێكی ناودار لە وڵاتێكی دیكە كە سەدان ساڵە لە دەوڵەتێكی پێشكەوتووە لەرووی هونەرەوە، بۆچی یەكجار دەستخۆشیان لێنەكردم، یان پارەی یەك كلیپیان خەرج نەكرد كە ئێستا خاوەنی هەشت كلیپ و سێ بەرهەمم، بەڵام تا ئەم ساتەش هیچ كەسێك ئاوڕی لێنەدامەوەتەوە.
ئەو هونەرمەندە، زیاتر دەڵێ: بۆ گەیشتن بە خۆشەویستەكەم قوربانی زۆرم داوە، خانەوادەی هاوسەرەكەم هیچ كێشەیەكیان نەبووە لەگەڵ هونەرەكەم و ژیانێكی زۆر ئاسوودەم هەیە لەگەڵ خێزانەكەم، تەنانەت هاوسەرەكەم تێكست بۆم دەنووسێت و بەردەوام كار دەكات بۆ ئەوەی زیاتر پەرە بە كارە هونەرییەكانم بدەم، ئەمەش بۆ من جێگەی شانازییە، چونكە ئەگەر هاوسەرەكەم پاڵپشت نەبوایە لە زۆربەی كارەكان دوا دەكەوتم و نەم دەتوانی پەرە بە كارە هونەرییەكان بدەم”.