هەرێمی كوردستان خاوەن پێگەیەكی ستراتیژی گرنگ و بەهێزە
زاری كرمانجی -داڤۆس:
مەسرور بارزانی، سەرۆكی حكوومەتی هەرێمی كوردستان، بەشداری لە كۆڕبەندی ئابووری جیهانی داڤۆس كرد، سەرۆكی حكوومەت لە كۆبوونەوەكانی دا لەگەڵ بەرپرسان و سەركردە سیاسی و خاوەنكارانی جیهان، چەندین بابەت تاوتوێ كران، لەوانە هەمەچەشنكردنی ئابووری، گرنگیدان بە خزمەتگوزارییە بانكییەكان، دۆزینەوەی بازاڕی نوێ بۆ بەرهەمە كشتوكاڵییەكانی كوردستان، وەبەرهێنان لە بواری كانزا و نەوت و گاز و وزەی پاك، جیا لە پێشهات و گۆڕانكارییەكانی هەرێمی كوردستان و دۆخی گشتیی عێراق و ناوچەكە.
جێی ئاماژەیە، لە ئەنجامی كۆبوونەوەكانی سەرۆكی حكوومەت لەگەڵ كۆمەڵێك خاوەنكار و وەبەرهێنەران و نوێنەری وڵاتانی كەنداو لە كۆڕبەندی ئابووری داڤۆس لە ساڵی رابردوودا، توانرا پڕۆسەی هەناردەكردنی هەناری كوردستان بە سەركەوتوویی بەڕێوە بچێ و هەناری كوردستان گەیشتە چەند وڵاتێكی كەنداو و ئەم پڕۆژەیە هەتا ئێستاش بەردەوامە، هەروەها ئێستا كار دەكرێت بۆ هەناردەكردنی بەرهەمی دیكەی خۆماڵی هەرێمی كوردستان بۆ وڵاتانی كەنداو، لە هەمانكاتدا گفتوگۆ لەگەڵ وەبەرهێنەران و بازرگانە نێودەوڵەتییەكان بەردەوامە دەربارەی دەرفەتەكانی وەبەرهێنان لە هەرێمی كوردستان، بە تایبەتی لە بوارەكانی وزە و بانك و بە دیجیتاڵكردن و بنیاتنانی ژێرخان و پیشەسازیدا.
د. سەردار محەمەد، مامۆستای زانكۆ، بۆ زاری كرمانجی دیاركرد: كۆڕبەندی داڤۆس ساڵانە ئەنجام دەدرێت، لەو كۆڕبەندەدا پرسە جیهانییەكانی تایبەت بە ئابووری، سیاسەت، ئاسایش و سەقامگیری باس دەكرێن، لە كۆڕبەندەكەدا بە سەدان سەرۆك و سەركردەی وڵاتان و كەسانی شارەزا و كاریگەر بەشدار دەبن، بە داوەتێكی فەرمی سەرۆكی حكوومەتی كوردستانیش بەشدار بوو لە كۆڕبەندەكە، ئەوەش نیشانەی ئەوەیە هەرێمی كوردستان گرنگی خۆی هەیە، لە بواری ئابووری و سیاسی، سەرۆكی حكوومەت چەندین دیدار و چاوپێكەوتنی گرنگی هەبوو، لەگەڵ سەرۆكی وڵاتانی كاریگەر، بۆیە ئەو كۆڕبەندە گرنگی خۆی هەیە بۆ هەرێمی كوردستان لەرووی ئابووری و سیاسییەوە، هەروەها لە كۆڕبەندەكەدا باسی كەشوهەوای جیهان كرا، لە داهاتوودا گرنگی بەشداری سەرۆكی حكوومەت لە كۆڕبەندەكە بۆ هەرێمی كوردستان بەدەر دەكەوێت.
شاكر وەسمان، چاودێری سیاسی، بۆ زاری كرمانجی روونیكردەوە: بەشداربوونی سەرۆكی حكوومەت لەو كۆڕبەندەدا سەركەوتنێكی گەورەیە بۆ هەرێمی كوردستان، چونكە زۆربەی بڕیاربەدەستانی جیهان لەو كۆڕبەندەدا بەشدار بوون، ئەوەش بووە هۆی ئەوەی كە سەرۆكی حكوومەت چەندین دیداری گرنگی لەگەڵ ئەو سەركردانە هەبێت، ئەوەش بۆ ئەوەیە كە پەیوەندی هەرێم لەگەڵ وڵاتان بەرەو پێشەوە ببات، بۆیە ئەو كۆڕبەندە دەرفەتێك بوو بۆ هەرێمی كوردستان كە پەیوەندییەكانی خۆ لەگەڵ جیهان بەرەوپێشەوە ببات و لەرووی ئابووریشەوە كوردستان زیاتر پێش بكەوێت”.
